Félagslífið hjá eldri borgurum stöðugt fjölbreyttara
Vel var mætt á aðalfund Félags eldri borgara í Dalabyggð og Reykhólahreppi sem haldinn var í Króksfjarðarnesi í gær. Eftir fundinn var kaffi í boði Bjarkar Bárðardóttur og Guggu í Gautsdal, farið var í vísnaleik og vefaradans og kórinn söng. Í skýrslu Þrúðar Kristjánsdóttur formanns félagsins kom fram, að starfið er stöðugt að eflast. Hér fara á eftir nokkrir punktar varðandi félagsstarfið og það sem félagsfólki stendur til boða.
- Gönguhópar starfa bæði í Búðardal og Saurbæ. Í samráði við Dalabyggð hefur verið komið upp bekkjum í Búðardal svo að fólk geti sest á milli göngutúra.
- Sundtímar eru á Laugum í Sælingsdal.
- Postulínsnámskeið var í október og afar vel sótt og mikið unnið.
- Opið hús er einu sinni í viku, ýmist í Búðardal eða Nesi, og sér félagsfólk um dagskrá og veitingar.
- Boðið er upp á að fara í ræktina í tækjasal í Búðardal.
- Í haust var námskeið í boccía. Nokkur hópur er að iðka það og hefur farið á eitt mót í Borgarnesi.
- Kór eldri borgara sem Víví Kristóbertsdóttir hafði forgöngu um að stofna hefur starfað af miklum krafti undir stjórn Halldórs Þórðarsonar. Alltaf er sungið á Opnu húsi auk þess sem æfingar eru vikulega.
- Félaginu barst gjöf frá Kvenfélaginu Fjólu í Suðurdölum og var keypt fyrir það nýtt hljómborð sem nýtist vel við kórstarfið.
- Hjónin Jóhann Sæmundsson og Jarþrúður Kristjánsdóttur gáfu félaginu tölvu.
- Danshópur er að fara af stað og verður í Dalabúð á laugardagskvöldið í fyrsta skipti.
- Farið var í ferðalag í Borgarfjörðinn á síðasta sumri og var metþáttaka eða 35 manns.
- Verið er að spá í leikhúsferð á næstunni.
- Lokahátíð félagsins verður í Dalabúð 18. apríl. Fyrirhugað er að bjóða öllum 65 ára og eldri sem ekki eru í félaginu að koma og vera með.
Sjö nýir félagar hafa bæst við frá síðasta aðalfundi. Núna eru í félaginu um 70 manns, þar af 12 í Reykhólahreppi.
Úr aðalstjórn áttu að ganga systurnar Þrúður og Jóna Valgerður Kristjánsdætur og voru þær einróma endurkosnar til næstu tveggja ára. Í varastjórn var kosinn Halldór Þórðarson.
Stjórnin er nú þannig skipuð: Þrúður Kristjánsdóttir formaður, Víví Kristóbertsdóttir varaformaður, Jóna Valgerður Kristjánsdóttir ritari, Björk Bárðardóttir gjaldkeri og Guðbrandur Þórðarson meðstjórnandi. Í varastjórn eru Guðrún Björnsdóttir og Halldór Þórðarson.
Myndir nr. 1-3 tók Inga Þorkelsdóttir á aðalfundinum en mynd nr. 4 tók hún á bingói í Vogalandi fyrir skömmu.
► 20.03.2013 Hagur að vera í Félagi eldri borgara