Björgunarsveitarmaðurinn og snjóflóðaeftirlitsmaðurinn Þröstur Reynisson á Patreksfirði (frá Gufudal) verður með opinn fræðslufund á Reykhólum á laugardag á vegum Björgunarsveitarinnar Heimamanna í Reykhólahreppi. „Stundar þú útivist á veturna, skíði, snjósleðaferðir eða gönguferðir? Veistu hvernig þú átt að bregðast við ef þú lendir í snjóflóði eða þarft að leita að félaga þínum sem varð undir hengju eða flóði?“ er spurt í tilkynningu frá Heimamönnum.

„Komdu í Reykhólaskóla kl. 13 laugardaginn 16. febrúar og hlustaðu og horfðu á fyrirlestur hjá Þresti Reynissyni. Kostar ekkert. Gæti komið sér vel að kunna. Allir áhugasamir velkomnir“, segir þar einnig.