Ferðamálasamtökin: Þreyttur á leiðinlegri baráttu
Sigurður Atlason hjá Strandagaldri á Hólmavík var endurkjörinn formaður Ferðamálasamtaka Vestfjarða á aðalfundi í Bjarkalundi í Reykhólasveit um helgina. Hann hafði lýst því yfir að hann gæfi ekki kost á sér áfram en skipti um skoðun á síðustu stundu vegna eindreginna áskorana. Sigurður hefur gegnt formennsku síðustu þrjú ár. Ástæðu þess að hann ákvað að gefa ekki kost á sér lengur sagði hann hafa verið þá, að síðasta ár hefði farið í mjög erfiða, leiðinlega og slítandi baráttu við yfirgang og skilningsleysi sveitarstjórnarfólks á Vestfjörðum. Sjá nánar hér.
Ekkert mótframboð kom gegn Sigurði Atlasyni og var hann endurkjörinn formaður Ferðamálasamtakanna með lófataki.
Úr stjórn Ferðamálasamtaka Vestfjarða gengu að þessu sinni Einar Unnsteinsson á Laugarhóli í Bjarnarfirði, Ragna Magnúsdóttir í Bolungarvík og Keran Stueland Ólason í Breiðavík. Í stað þeirra hlutu kosningu Valgeir Benediktsson í Trékyllisvík, Elfar Logi Hannesson á Ísafirði og Jón Þórðarson á Bíldudal. Auk Sigurðar Atlasonar sitja áfram í stjórn Ester Rut Unnsteinsdóttir í Súðavík, Halldóra Játvarðardóttir á Miðjanesi í Reykhólasveit og Sigurður Arnfjörð Helgason á Núpi í Dýrafirði.
Hér fylgja svipmyndir frá aðalfundinum. Eins og sjá má (myndir 8-13) var formanninum Sigurði Atlasyni nokkuð niðri fyrir þegar hann flutti ársskýrslu sína. Hann færðist stöðugt í aukana eftir því sem á leið og skyndilega var bleik prjónahúfa með skotti komin á höfuð galdramannsins af Ströndum.