Ferðin heim, smásögur úr Árneshreppi
Íslenska heimildamyndin Ferðin heim, smásögur úr Árneshreppi, sem fjallar um mannlífið og náttúruna í einu afskekktasta héraði landsins, verður í Sjónvarpinu kl. 20.20 annað kvöld, þriðjudag. Í þessari klukkustundarlöngu mynd leiðir María Guðmundsdóttir ljósmyndari áhorfendur inn í daglegt líf fólks í Árneshreppi á Ströndum á árunum 2009-2014.
Vigdís Grímsdóttir rithöfundur tók flest viðtölin í myndinni en Anna Dís Ólafsdóttir gerði handritið.
Hér má lesa stutt viðtal við Maríu í Fréttatímanum um gerð myndarinnar: Heimildamynd um æskuslóðirnar. Þar segir hún meðal annars:
„Ég bjó þarna til 12 ára aldurs og flutti til Reykjavíkur árið 1953. Margir af þeim sem ég man eftir úr barnæsku búa í Djúpavík ennþá, en þar var ég alin upp,“ segir hún. „Auðvitað eru svo yngri kynslóðir líka, sem ég hef kynnst á undanförnum árum og þarna er alveg yndislegt fólk.“
María Guðmundsdóttir ljósmyndari er fyrrum Ungfrú Ísland. Eftir að hún komst í úrslit keppninnar Ungfrú Alheimur buðust henni ný tækifæri þar sem hún varð eftirsótt fyrirsæta erlendis. Hún var þar brautryðjandi fyrir margar íslenskar stúlkur sem fylgdu á eftir í fyrirsætustörfin.
Hér má sjá brot úr Ferðinni heim.