Fimm býli fengu hrútaverðlaun
Fimm sauðfjárbú fengu verðlaun fyrir úrvalsgóða hrúta á aðalfundi Sauðfjárræktarfélags Reykhólahrepps í gær. Bændurnir sem tóku við verðlaununum eru Arnór Hreiðar Ragnarsson á Hofsstöðum (sem er reyndar með sauðfé sitt á Klukkufelli), Karl Kristjánsson á Kambi, Kristján Þór Ebenesersson f.h. félagsbúsins á Stað, Tómas Sigurgeirsson á Reykhólum og Þórður Jónsson í Árbæ. Naumast þarf að taka fram, að jafnan kemur fleira fólk við sögu í búskapnum en viðtakendur verðlaunanna einir. Þannig eru það í raun fjárbúin sjálf sem hljóta verðlaunin.
Gestur fundarins var Lárus Birgisson, héraðsráðunautur í Borgarnesi. Fundurinn var vel sóttur.
Stjórn Sauðfjárræktarfélags Reykhólasveitar skipa Eiríkur Snæbjörnsson formaður, Karl Kristjánsson og Indiana Ólafsdóttir.
Félagið var stofnað á Reykhólum 24. janúar 1973. Í fyrstu stjórn voru Friðgeir Snæbjörnsson á Stað, Þórður Jónsson í Árbæ og Vilhjálmur Sigurðsson á Miðjanesi. Sigurgeir Tómasson á Reykhólum var formaður eitt ár en allt frá því snemma árs 1976 hefur Eiríkur Snæbjörnsson á Stað verið formaður félagsins, að undanteknum einu eða tveimur árum inni á milli þegar hann gaf ekki kost á sér.
Meðfylgjandi myndir tók Indiana Ólafsdóttir á Reykhólum. Smellið á þær til að stækka.