Í fjárhagsáætlun Reykhólahrepps, sem samþykkt var við síðari umræðu á fundi sveitarstjórnar í gær, er gert ráð fyrir 28 milljóna króna hagnaði af rekstri sveitarfélagsins og stofnana þess á næsta ári. Heildartekjur samstæðunnar eru áætlaðar 520 milljónir, launagreiðslur 297 milljónir, annar rekstrarkostnaður 175 milljónir og afskriftir og fjármagnsliðir 20 milljónir.

Jafnframt var á fundinum samþykktur viðauki (leiðrétting) við fjárhagsáætlun þessa árs (2016) fyrir sveitarfélagið og stofnanir þess. Þar er gert ráð fyrir auknum launa- og rekstrarkostnaði upp á 12 milljónir króna en auknum tekjum upp á 26 milljónir. Þannig er núna gert ráð fyrir að rekstrarhagnaður árið 2016 verði 34 milljónir króna.

Á fundinum var staðfest fjárhagsáætlun Hjúkrunar- og dvalarheimilisins Barmahlíðar fyrir næsta ár, en Reykhólahreppur á og rekur heimilið. Áætlunin var samþykkt á fundi stjórnar heimilisins fyrr í vikunni. Gert er ráð fyrir 19 milljóna króna hagnaði af rekstrinum á árinu 2017.

Um síðustu áramót nam eigið fé sveitarfélagsins 387,5 milljónum króna. Gert er ráð fyrir að það verði 459 milljónir króna í lok næsta árs.

Fundargerðir sveitarstjórnar og nefnda sveitarfélagsins er að finna í reitnum Fundargerðir hér neðst til vinstri á síðunni.

Sjá má ársreikninga og fjárhagsáætlanir seinni ára undir Stjórnsýsla - Ársreikningar og áætlanir í valmyndinni vinstra megin.