« 1 af 3 »

Sýningin með því sérstæða og skemmtilega nafni Þrírifað í þrístýft og þrettán rifur ofan í hvatt verður uppi í Sauðfjársetrinu á Ströndum í allt sumar. Nemendur í Reykhólaskóla unnu þetta verkefni en kennararnir Kolfinna Ýr Ingólfsdóttir og Rebekka Eiríksdóttir höfðu umsjón með því. Hér getur að líta fjármörk í Reykhólahreppi og heiti þeirra en sauðfjárbúskapur er nú á 28 bæjum í hreppnum. Einstök eyrnamörk í þessu verkefni eru alls 63. Eyrun voru þannig búin til, að krakkarnir þæfðu ull og sniðu eyru úr þófanum og mörkuðu síðan. Ullarþófaeyru þessi eru talsvert stærri en eru á fénu í raun. Notast var við ull fremur en annað efni í þeim tilgangi að skapa meiri tengsl við sauðkindina.

Sauðfjáreigendum gefst kostur á að fá mörkin sín unnin með þessum hætti á plötu til að hengja upp á vegg ásamt nafni bæjarins og markaheitunum (sjá mynd nr. 3). Plöturnar eru sorfnar og brenndar á jöðrum og fá þannig „gamalt" útlit. Þeir sem vilja eignast þannig markaplötu geta haft samband við Rebekku eða Kolfinnu.

Sýningin Þrírifað í þrístýft og þrettán rifur ofan í hvatt var opnuð við upphaf Furðuleika á Ströndum í lok síðasta mánaðar og færði Arnar S. Jónsson framkvæmdastjóri Sauðfjársetursins nemendum Reykhólaskóla og kennurum þeirra þakkir fyrir verkið. Þegar sýningin verður tekin niður í Sauðfjársetrinu í haust verður hún sett upp í Reykhólaskóla.

Smellið á myndirnar til að stækka þær.