Krakkarnir úr Reykhólaskóla sem tóku þátt í undankeppninni í Skólahreysti í fyrradag, þar sem lið frá skólum á Vesturlandi öttu kappi, stóðu sig með prýði. Ottó Hlíðar Gunnarsson keppti í upphífingum og dýfum, Dagný Bjarkadóttir í armbeygjum og hreystigreip en Margrét Björnsdóttir og Róbert Freyr Ingvason í hraðaþraut. Allir hinir krakkarnir fimm úr unglingadeildinni mættu á keppnina til að styðja liðið sitt. Keppendur frá Reykhólaskóla voru þannig nærri helmingur þeirra sem eru í unglingadeildinni.

 

Ellefu skólar kepptu í þessum riðli. Lið Varmalandsskóla í Borgarfirði sigraði og heldur áfram í lokakeppnina í Laugardalshöll 29. apríl. Sjónvarpið sýnir þætti frá undankeppnunum á þriðjudögum næstu vikurnar og verður sá fyrsti þann 30. mars.

 

Í undirbúningnum fyrir keppnina stóð Stefán íþróttakennari á Reykhólum við bakið á krökkunum. Starfsmenn í Þörungaverksmiðjunni smíðuðu tæki sem hengd eru á rimlana í íþróttahúsinu svo að þau gætu æft sig.

 

Undir þessari slóð má sjá árangurinn eftir greinum. Velja þarf Ridill 8 2010 í þar til gerðum valreit til að fá upp Vesturlandsriðilinn, 8. riðil.