Mannfjöldi á Vestfjörðum stóð í stað.

Samkvæmt tölum Hagstofunnar um mannfjölda um áramótin, sem birtar voru í morgun, fækkaði skráðum íbúum í Reykhólahreppi um þrjá á síðasta ári, eða úr 271 þann 1. janúar 2014 í 268 manns þann 1. janúar 2015. Karlar töldust 137 og hafði fækkað um einn en konur 131 og hafði fækkað um tvær. Í þorpinu á Reykhólum fjölgaði hins vegar um þrjá, eða úr 129 manns í 132, körlum úr 65 í 67 og konum úr 64 í 65. Þannig fækkaði um sex manns í sveitum Reykhólahrepps milli ára, eða úr 142 í 136 manns, körlum úr 73 í 70, konum úr 69 í 66.

Í sveitarfélögunum níu á Vestfjörðum í heild má segja að mannfjöldinn hafi nánast staðið í stað. Íbúum fækkaði um 2 á milli ára, eða úr 6.972 í 6.970 manns.

Ef litið er á næstu sveitarfélög við Reykhólahrepp kemur í ljós, að í Vesturbyggð fjölgaði um 53 eða úr 949 í 1.002 (mesta fjölgun í einu sveitarfélagi á Vestfjörðum), í Dalabyggð fjölgaði um 7 eða úr 673 í 680, en í Strandabyggð fækkaði um 33 eða úr 506 í 473 (mesta fækkun í einu sveitarfélagi á Vestfjörðum).