Fjölgun á Litlu-Grund - peysur prjónaðar?
Þrír hænuungar litu dagsins ljós á Litlu-Grund í Reykhólasveit í gær. Ekki þó með „hefðbundinni aðferð“ heldur í útungunarvél. „Hænsnabóndinn minn er alsæll með árangurinn,“ segir Ásta Sjöfn Kristjánsdóttir á Litlu-Grund, en þar á hún við elsta soninn. Hann keypti sjálfur útungunarvélina og núna á að setja í hana á nýjan leik.
Myndirnar eru fengnar af Facebook-síðu Ástu Sjafnar. Hér eru bræðurnir þrír á Litlu-Grund í aldursröð, þeir Tindur Ólafur, Ketill Ingi og Kristján Steinn Guðmundssynir með ungana þrjá í aldursröð, Ólaf Ragnar Grímsson, Snjókorn og Nótt. Sá elsti (þ.e. af ungunum) er ákveðnastur í framgöngu og góður ræðuungi eins og nafnið gefur til kynna.
Nú er bara að sjá hvort oddvitinn prjónar peysur á þessa nýfæddu íbúa Reykhólahrepps.