Fjórðungsþing Vestfirðinga sem haldið var um helgina tók fyrir verkefni vegna Sóknaráætlunar landshluta, sem er átaksverkefni á vegum ríkisstjórnarinnar. Í aðdraganda þingsins fór fram forval á verkefnum í samvinnu við sveitarfélög og aðra hagsmunaaðila á Vestfjörðum og var þeim síðan forgangsraðað á þinginu. Verkefnin taka mið af forsendum áætlunarinnar Ísland 20/20 samkvæmt tilmælum fjármálaráðuneytis vegna undirbúnings fjárlagagerðar. Miðað var við val á allt að sjö verkefnum sem verði á fjárlögum fyrir næsta ár.

Niðurstaða þingsins var að verkefnunum skuli raðað í eftirfarandi forgangsröð:

• 1. Sókn í samgöngum Vestfjarða
• 2. Auðlindasjóður
• 3. Virkjun í Hvalá í Ófeigsfirði á Ströndum
• 4. Framhaldsskóladeild á Hólmavík
• 5. Umhverfisvottun Vestfjarða
• 6. Háskóli hafsins
• 7. Efling heilbrigðisstofnunarinnar á Patreksfirði

Tillögum þessum verður skilað til fjármálaráðuneytis núna á föstudaginn sem verkefnum vegna Sóknaráætlunar landshluta fyrir Vestfirði.