Fólki fjölgar í Reykhólahreppi og á Reykhólum
Fjölgað hefur um þrettán manns í Reykhólahreppi síðasta árið, samkvæmt nýbirtum tölum frá Hagstofu Íslands. Skráðir íbúar í hreppnum voru 266 hinn 1. desember í fyrra en voru 279 hinn 1. desember síðastliðinn. Á sama tímabili hefur íbúum á Reykhólum fjölgað um fjóra eða úr 129 í 133, þannig að heildarfjölgunin í hreppnum er að mestu í dreifbýlinu, þar sem fjölgað hefur um níu manns.
Athygli vekur, að konum hefur fjölgað meira en körlum. Konur skráðar í Reykhólahreppi voru 125 fyrir ári en eru nú 134. Karlar skráðir í Reykhólahreppi voru 141 fyrir ári en eru nú 145. Konur á Reykhólum voru 61 fyrir ári en eru nú 64. Karlar á Reykhólum voru 68 fyrir ári en eru nú 69. Í hreppnum öllum eru því karlar ellefu fleiri en konurnar og á Reykhólum eru karlar fimm fleiri en konurnar.
Ef litið er rúman áratug aftur í tímann, þá voru íbúar á Reykhólum 136 árið 1997 eða þremur fleiri en nú. Eftir það fækkaði þeim nokkuð og urðu fæstir 2004 og 2006 eða 114 hvort ár. Þannig hefur fjölgað á Reykhólum um 19 manns síðustu tvö árin (16,7% fjölgun).
Ef litið er á sveitarfélagið í heild á sama tíma, þá voru íbúar Reykhólahrepps 335 árið 1997 eða 56 fleiri en nú. Eftir það fækkaði þeim jafnt og þétt og fæstir voru þeir 2006 eða 251. Síðustu tvö árin hefur þeim síðan fjölgað á ný um 28 manns (11,2% fjölgun) eða um réttan þriðjung af fækkuninni frá 1997 til 2006.
Allar tölur hér eru miðaðar við 1. desember ár hvert. Aðgengilegar tölur í reikniforriti á vef Hagstofunnar ná aðeins aftur til ársins 1997.
Myndina af Vaðalfjöllum tók Þórarinn Ólafsson.