Í ljósum upphlut við dökkleitt pils.

Fyrsti gráminn í fjöllum á þessu hausti, séð frá Reykhólum, blasti við í morgun. Slydduslummur dundu á rúðum en urðu skammlífar og runnu rétt eins og tár á vöngum. Reykjanesfjallið var grátt og rúmlega það niður í miðjar hlíðar. Hitinn á láglendi fór í tæp tvö stig milli klukkan fimm og átta í morgun en hitastigið lækkar að jafnaði um eina gráðu fyrir hverja hundrað metra hækkun. Stíf norðaustanátt með rigningu hefur verið í dag og síðdegis er gráminn horfinn. Í bili. Grundaráin og Heyáin og aðrar ár sem nærast af fjallinu eru hvítfyssandi og glaðar.

Fölva sló á sumardagsins vanga, segir í gamalli vísu. Annað sem þar segir líka og rímar við þetta rætist vonandi ekki svo heitið geti: Haustið verður mörgum erfið ganga.