Framhaldsdeild stofnuð á Hólmavík annað haust?
Sveitarstjórn Strandabyggðar samþykkti í fyrradag að sækja um það til ráðuneytis menntamála, að stofnuð verði framhaldsskóladeild á Hólmavík haustið 2013. Í bókun sveitarstjórnar segir, að hún hafi fyrir skömmu átt góðan fund með Karli Kristjánssyni sérfræðingi í framhaldsskóladeild ráðuneytisins og í kjölfar þess fundar fari hún fram á stofnun framhaldsdeildar. Meðal markmiða með rekstri slíkrar deildar á Hólmavík væri að efla menntunarstig, atvinnulíf og samfélag á Ströndum og í Reykhólahreppi og jafnvel einnig Dalabyggð.
Ekki væri langt að sækja fyrirmynd til Patreksfjarðar, þar sem Fjölbrautaskóli Snæfellinga í Grundarfirði rekur framhaldsdeild.
Vegalengdin frá Reykhólum til Hólmavíkur um Þröskulda (Arnkötludal) er um 58 km en aðeins um 35 km frá þeim bæjum í Geiradal sem næstir eru vegamótum.
Sjá einnig:
Fjölbrautaskóli Snæfellinga - framhaldsdeildin á Patreksfirði