Íbúafundurinn um framtíðarkosti í vegamálum, sem haldinn var á Reykhólum í gærkvöldi, var mjög vel sóttur, en auk sveitarstjórnar sátu hann um fimmtíu manns. Ræddir voru hinir ýmsu möguleikar í vegagerð frá Bjarkalundi að Kraká, bæði þeir sem eru á borðinu nú þegar og nýir kostir eins og jarðgöng og fleira. Möguleiki á þverun Þorskafjarðar yfir mynni hans, með eða án sjávarfallavirkjunar, var einnig ræddur. Kynning og umræður stóðu um tvær klukkustundir. Gerð var viðhorfskönnun meðal fundargesta og verður unnið úr henni á næstu dögum og niðurstaðan væntanlega birt hér á vefnum. Í lok fundar var ályktað að framhaldsfundur verði haldinn þegar vegamálin skýrist frekar.

 

Hér má skoða á pdf-formi glærukynningu Bjarna M. Jónssonar hjá Vesturorku á íbúafundi um vegamál, sem haldinn var á Reykhólum fyrir ári. Þar kynnti hann hugmyndir um að samþætta veg og sjávarfallavirkjun í sameiginlegu mynni Þorskafjarðar, Djúpafjarðar og Gufufjarðar. Glærukynningin sem hér birtist er að vísu eitthvað aukin og endurbætt frá þeim tíma.

 

Meðfylgjandi myndir voru teknar á fundinum í matsal Reykhólaskóla í gærkvöldi.

 

Sjá einnig:

27.04.2010  Meistarapróf um virkjun sjávarfalla á Vestfjörðum

16.03.2010  Kynning á þverun fjarða og sjávarfallavirkjun