Framlög í hugmyndabanka þorrablótsins óskast
Hugmyndabankastjórnin fyrir þorrablótið í Reykhólahreppi 2009 hefur tekið til starfa. Óskað er eftir framlögum af ýmsu tagi, svo sem gamanvísum, bröndurum, grínsögum, auglýsingum og hverju öðru skemmtilegu sem fólki dettur í hug. Þeir sem sótt hafa blótin á liðnum árum og áratugum ættu svo sem að vita eftir hverju er leitað. Útibú hugmyndabankans eru tvö, annað í versluninni Hólakaupum og hitt í Sparisjóðnum í Nesi. Þar hefur verið komið upp kössum sem minna einna helst á hraðbanka nema hvað ekki er hægt að taka út úr þeim heldur aðeins leggja inn. Framlög þurfa að hafa borist fyrir föstudag 16. janúar. Innistæðunnar verður svo notið sameiginlega á blótinu þegar þar að kemur.
Þorri er fjórði mánuður vetrar í gamla norræna tímatalinu. Hann hefst í þrettándu viku vetrar, 18.-24. janúar miðað við það tímatal sem nú er notað, og alltaf á föstudegi, að þessu sinni föstudaginn 23. janúar. Fyrsti dagur þorra er bóndadagurinn en síðasti dagur hans nefnist þorraþræll. Daginn eftir byrjar svo góa og fyrsti dagur hennar er konudagurinn.
Hér er ef til vill ekki óviðeigandi að rifja upp nokkur erindi úr alkunnum brag:
Þegar hnígur húm að Þorra
oft ég hygg til feðra vorra
og þá fyrst og fremst til Snorra,
sem framdi Háttatal.
Snorri kallinn kunni' að svalla
og að kæta rekka snjalla
þegar húmi tók að halla
í höllu Skúla jarls.
Og hann þoldi þreyta bögur,
og að þylja fornar sögur,
já, allt fram til klukkan fjögur,
þá fór hann í sitt ból.
Harpa Eiríksdóttir, rijudagur 06 janar kl: 00:36
Er hægt að senda með tölvupósti auglýsingar ofl?