Engar breytingar urðu á aðalstjórn Barðstrendingafélagsins á aðalfundi þess fyrir nokkru. Sú breyting varð á varastjórn að Einar Óskarsson frá Firði gaf ekki kost á sér áfram en í hans stað kom Hugrún Einarsdóttir frá Gilsfjarðarbrekku. Þetta kemur fram í nýútkomnu fréttabréfi Barðstrendingafélagins, Sumarliða pósti, 174. tölublaði. Meðal efnis í fréttabréfinu má nefna samantekt Jónínu Hafsteinsdóttur, sem nefnist Nokkrar gamlar vísur. Þar eru vísur úr safni Ármanns Einarssonar frá Brekkuvelli, sem lést á síðasta hausti.

 

Fram kemur í Sumarliða pósti, að vinnuferð verður farin í Heiðmerkurreit Barðstrendingafélagsins núna á miðvikudag og félagar hvattir til að fjölmenna og prýða Barðalund. Árleg dagsferð Kvennadeildar Barðstrendingafélagsins verður farin á Jónsmessunni. Allir úr Barðastrandarsýslu sem eru orðnir 67 ára, ásamt mökum eða aðstoðarfólki, eru velkomnir.

 

Aðalstjórn Barðstrendingafélagsins skipa:

• Snorri Jóhannesson frá Bæ á Bæjarnesi, formaður.
• Ásta Jónsdóttir frá Deildará, varaformaður.
• Jóhanna Fríða Dalkvist frá Mýrartungu I, gjaldkeri.
• Ólína Kristín Jónsdóttir frá Mýrartungu II, ritari.
• Hjörvar Garðarsson frá Patreksfirði, meðstjórnandi.
• Aðalheiður Hallgrímsdóttir frá Mýrartungu II, meðstjórnandi.
• Aldís Jónsdóttir frá Patreksfirði, meðstjórnandi.

Varastjórn Barðstrendingafélagsins skipa:

• Helgi Sæmundsson frá Patreksfirði.
• Sædís Hrönn Jóhannesdóttir, ættuð frá Brekkuvöllum.
• Ólafur A. Gíslason úr Skáleyjum.
• Hugrún Einarsdóttir frá Gilsfjarðarbrekku.

Í ritnefnd Sumarliða pósts eru Aðalheiður Hallgrímsdóttir og Ólína Kristín Jónsdóttir.

 

Aðsetur Barðstrendingafélagsins er í Konnakoti, Hverfisgötu 105 í Reykjavík.

 

Barðstrendingafélagið er rétt þremur mánuðum eldra en íslenska lýðveldið, stofnað 15. mars 1944.

 

Stórvirki sem Barðstrendingafélagið vann strax á fyrstu árum sínum var að reisa hótelin í Bjarkalundi og Flókalundi. Þá voru samgöngur ekki eins greiðar og nú og mikil þörf á áfangastöðum fyrir þá sem leið áttu vestur eða suður á bóginn. Sumir telja reyndar að þjóðvegurinn um vestanverða Austur-Barðastrandarsýslu og austanverða Vestur-Barðastrandarsýslu hafi á stórum köflum lítið batnað á öllum þessum tíma.

 

Ásamt Rithöfundasambandi Íslands og Reykhólahreppi stóð Barðstrendingafélagið fyrir gerð minnisvarða um Gest Pálsson rithöfund og ritstjóra sem fæddur var á Miðhúsum í Reykhólasveit, rétt innan við Reykhóla. Minnisvarðinn sem er alveg við þjóðveginn ofan við Miðhús er liðlega þriggja metra hár blágrýtisdrangur sem Þórir Barðdal myndhöggvari fór höndum um. Hann var afhjúpaður 25. ágúst 1991. Nokkrum dögum áður voru liðin 100 ár frá því að Gestur andaðist vestur í Kanada, aðeins tæplega fertugur. Minnisvarðann afhjúpuðu þær María Jónsdóttir, formaður Barðstrendingafélagsins, og Ólína Jónsdóttir á Miðhúsum.

 

Vefsíða Barðstrendingafélagsins