Fuglanámskeið á Hólmavík
Námskeið um fugla, bæði íslenska varpfugla og farfugla sem fara hér um, verður haldið í Þróunarsetrinu á Hólmavík á laugardag, 2. maí, frá kl. 10 til 16. Farið verður í greiningar á nokkrum tegundum, búsvæði fuglanna og hvar og hvenær ákveðnar tegundir er best að sjá. Einnig verður farið yfir stofnstærðir ákveðinna tegunda, lög, reglur og alþjóðlegar samþykktir. Að lokum verður farið í vettvangsferð á Hólmavík eða í nágrenninu. Leiðbeinandi verður Böðvar Þórisson náttúrufræðingur á Náttúrustofu Vestfjarða í Bolungarvík.
Námskeiðið er einkum ætlað fólki í ferðaþjónustu sem tekur á móti gestum sem áhuga hafa á fuglum og fuglaskoðun, en allir eru velkomnir. Námskeiðsgjald er kr. 9.900. Þátttakendur þurfa að hafa með sér kíki og minnisbók og einnig mega þeir sem eiga hafa með sér gps-tæki.
Þegar hefur náðst næg þátttaka en búið er að framlengja skráningarfrestinn til fimmtudags svo að fleiri geti verið með. Skráning hér eða hjá Stínu í síma 867 3164.