Fyrsta heimilisfólkið í Barmahlíð: Játvarður Jökull og Herdís.

Herdís Zakaríasdóttir á níræðisafmælinu árið 1986.

Hjónin Játvarður Jökull Júlíusson og Rósa Hjörleifsdóttir á Miðjanesi. Myndin er líklega tekin laust fyrir 1970.

Fyrsti forstöðumaður Barmahlíðar, María Björk Reynisdóttir.

Heimilisfólkið í Barmahlíð í setustofunni á afmælisdaginn 11. mars 2013.

Mikill hluti starfsfólksins í Barmahlíð ásamt lækninum á 25 ára afmæli heimilisins. Þuríður hjúkrunarforstjóri lengst til vinstri, Þórður Ingólfsson yfirlæknir í Búðardal í aftari röð.

Hér er starfsfólkið ásamt Þórði lækni komið út í blessaða blíðuna við steininn vestan við heimilið.

Hjúkrunar- og dvalarheimilið Barmahlíð á Reykhólum. Minnismerki Jóns Thoroddsen í forgrunni til hægri.

« 1 af 8 »

Fyrir réttum aldarfjórðungi eða föstudaginn 11. mars 1988 var Dvalarheimilið Barmahlíð á Reykhólum tekið í notkun þegar fyrsta heimilisfólkið fluttist þar inn. Það voru þau Herdís Zakaríasdóttir, húsfreyja í Djúpadal í Gufudalssveit, og Játvarður Jökull Júlíusson, bóndi og fræðimaður á Miðjanesi í Reykhólasveit. Tveimur dögum seinna eða sunnudaginn 13. mars var heimilið vígt með formlegum hætti. Margt var þó enn ófrágengið innanhúss.

Forsaga heimilisins frá fyrstu hugmyndum og fram til þess dags þegar það var tekið í notkun spannaði tæpan áratug. Mörg félög og samtök stóðu að þessu mikla framtaki en núna er Barmahlíð að fullu í eigu Reykhólahrepps, auk einnar íbúðar sem er í eigu Öryrkjabandalags Íslands.

Fyrsti forstöðumaður Barmahlíðar var María Björk Reynisdóttir hjúkrunarfræðingur. Þegar hún fór skömmu síðar í barneignarleyfi leysti Ingibjörg Kristjánsdóttir hjúkrunarfræðingur í Garpsdal hana af á meðan og tók síðan við starfinu að fullu fáum árum síðar þegar María Björk fluttist brott.

Framan af var jafnan talað um forstöðumann Barmahlíðar en á seinni árum er starfsheitið hjúkrunarforstjóri. Þeirri stöðu gegnir nú Þuríður Stefánsdóttir, sem tók við starfinu í ársbyrjun 2006 eða fyrir liðlega sjö árum.

Í daglegu tali er heimilið oftast nefnt Dvalarheimilið Barmahlíð eða einfaldlega Barmahlíð. Formlegt heiti þess er hins vegar Hjúkrunar- og dvalarheimilið Barmahlíð enda lýsir það best starfinu þar.

Á heimilinu eru 13 hjúkrunarrými og 2 dvalarrými. Auk þess er talsvert um tímabundnar hvíldarinnlagnir.

Að jafnaði er starfsfólkið í Barmahlíð um 12-15 manns. Þar af eru margir í hlutastarfi þannig að stöðugildin eru mun færri. Engu að síður er þetta einn af þremur stærstu vinnustöðunum á Reykhólum.

Barmahlíðardagurinn er árviss hátíð heimilisins sem haldin er á sumardaginn fyrsta ár hvert. Að þessu sinni ber hann upp á 25. apríl. Þá verður haldið með viðhöfn upp á þetta merkisafmæli eins af helstu hornsteinum Reykhólahrepps.