Fyrri slætti á Seljanesi í Reykhólasveit lauk í fyrradag en túnin þar heyja eins og undanfarin ár þeir bændur á Stað á Reykjanesi, Eiríkur Snæbjörnsson og Kristján Þór Ebenesersson. Stefán Hafþór Magnússon á Seljanesi er kunnur fyrir að gera upp fornbíla og forntraktora og í tilefni sláttarloka voru gamlar dráttarvélar settar fyrir rúllubaggavél af nýjustu gerð. Ekki hefðu þeir þó haft afl til að draga hana og vinna með henni og passa heldur engan veginn við hana.

 

Á myndunum er annars vegar amerískur bensíntraktor af gerðinni Allis Chalmers (rauður), árgerð 1949, þar sem Kristján Þór er undir stýri, og hins vegar þýskur Deutz (grænn), árgerð 1956 með ellefu hestafla dísilvél, þar sem Stefán Hafþór er undir stýri. Varðandi Chalmersinn segir Stefán: Við fengum þessa vél nánast í frumeindum sínum í febrúar og vorum að klára hana núna.

 

Af öðrum forntraktorum á Seljanesi má nefna annan Deutz sem er árg. 1957, Ferguson árg. 1953 og 1959, Farmall Cub, Farmall 217 árg. 1958, Farmall 275 og síðan einn með palli að framan, þýskur af gerðinni Lanz Alldog. Margir leggja leið sína að Seljanesi að kíkja á gömlu traktorana og bílana á sumri hverju.

 
Smellið á myndirnar til að stækka þær.