Teymt undir börnum í hlýrri og mildri rigningu á Reykhóladögum í fyrra.

Gönguhelgin Gengið um sveit hefur verið haldin í Reykhólahreppi allt frá sumrinu 2011. Núna eru vísbendingar um að hún hafi runnið sitt skeið. Minnt skal á mikilvægi þess að skrá sig fyrirfram, því að lágmarksþátttöku þarf til að af verði. Eins og staðan er nú að kvöldi fimmtudags er mjög léleg skráning í löngu gönguna (kjötsúpugönguna) á laugardag. Allar líkur eru á því að hún falli niður, í fyrsta sinn frá upphafi, nema úr rætist. Lokað verður fyrir skráningu síðdegis á morgun, föstudag. Ef hún fellur niður, þá má jafnframt búast við að þessi árlega gönguhelgi í Reykhólahreppi sé þar með úr sögunni.

Áformað var að afraksturinn af löngu göngunni (kjötsúpugöngunni) rynni til Björgunarsveitarinnar Heimamanna í Reykhólahreppi, auk þess sem liðsfólk hennar eldaði og legði fram súpuna.

En hvað sem því líður, þá mæta hestarnir Örn og Nasi, sem margir krakkar þekkja af reiðnámskeiði, fyrir framan Báta- og hlunnindasýninguna á Reykhólum kl. ellefu í fyrramálið, föstudag, og þar verður teymt undir börnum. Minnt er á að hjólahjálmarnir séu meðferðis.

Annað kvöld er (var) síðan áformuð létt söguganga um vegferð Grettis Ásmundarsonar með uxann á bakinu frá Tittlingsstöðum upp að Reykhólum ekki alls fyrir löngu, eða fyrir rétt tæpum þúsund árum.

Meðal þess sem fyrirhugað er (var) á dagskránni Gengið um sveit 2015 er einleikur Elfars Loga Hannessonar um Gretti Ásmundarson. Nema áhugi sé enginn.

Sjá hér dagskrána (a.m.k. eins og hún er (var) áformuð).