Gistinóttum ferðafólks á Vestfjörðum hefur fjölgað mjög síðustu árin. Á síðasta ári voru þær 91.809 talsins eða tæplega 13 þúsund fleiri en árið 2007. Íslendingar hafa verið í meirihluta þeirra sem nýta sér gistingu í fjórðungnum en útlendingum fjölgaði mikið á síðasta ári. Voru þá Íslendingar 49.141 en útlendingar 42.668. Meirihlutinn gisti á hóteli eða gistiheimili, eða 50.542 manns, en 41.267 nýttu sér annars konar gististaði, svo sem orlofshúsabyggðir, farfuglaheimili, svefnpokagististaði, tjaldsvæði, skála í óbyggðum og heimagististaði.

 

Þetta kemur fram í Landshögum 2009, hagtöluárbók Hagstofunnar. Þar kemur einnig fram að á tímabilinu janúar til apríl á síðasta ári voru 16 gististaðir í boði á Vestfjörðum en þeim fjölgaði í 27 á tímabilinu maí til ágúst. Þeim fækkaði svo aftur niður í 21 frá september til desember.

Gistinóttum hefur fjölgað hratt undanfarin þrjú ár, eftir því sem fram kemur í Landshögum. Árið 2006 voru gistinætur á Vestfjörðum 69.364 talsins, þar af voru 43.650 Íslendingar og 25.714 útlendingar. Árið 2007 voru gistinæturnar 78.868, þar af voru 45.778 Íslendingar og 33.090 útlendingar.

 

Gera má ráð fyrir að fjölgunin á árinu 2009 sé enn meiri. Samkvæmt könnun meðal ferðaþjóna í haust kom fram að tekjuaukning í ferðaþjónustu á Vestfjörðum hafi verið um þrjátíu prósent það sem af var árinu.

 

- Byggt á samantekt á vestfirska fréttavefnum bb.is.