Dalli við Glæðisgerð.

« 1 af 2 »

„Það hafa orðið miklar breytingar frá því ég byrjaði að markaðssetja Glæði um aldamót,“ segir Guðjón D. Gunnarsson (Dalli) á Reykhólum. „Fyrstu árin seldi ég mest í 25 lítra brúsum til verktaka en salan í litlum brúsum var lítil. Síðustu árin hefur salan í eins lítra og fimm lítra brúsum hins vegar stóraukist. Salan það sem af er þessu ári er að nálgast alla árssöluna í fyrra,“ segir hann.

Glæðir er lífrænn áburður úr íslensku hráefni sem nota má við lífræna ræktun. Hann hentar jafnt að vori sem hausti á grasflatir og tré og blóm bæði úti og inni. Vökvinn eins og hann kemur úr brúsunum er blandaður vatni til vökvunar og úðunar.

Núna í sumar eru fjórtán ár frá því að Dalli hóf tilraunir með þangvökva til áburðar. Hráefnið er klóþang, vatn og kalíumsódi og hæg eru heimatökin á Reykhólum hvað þangið varðar. Fyrstu árin eftir að framleiðslan hófst fóru í kynningu og prófanir fagmanna í garðyrkju en vorið 2001 kom Glæðir á almennan markað.

Dalli bruggar Glæði í bílskúrskjallaranum sínum við Hellisbraut og segir að framleiðslan sé einföld. Stórverslanir eru með Glæði til sölu í minni brúsunum, svo sem Bónus og Blómaval.

► Glæðir