Glasgowferð Kötlu: Nærbuxnakaup og gaman
Skotlandsferð Kvenfélagsins Kötlu í Reykhólahreppi í byrjun þessa mánaðar gekk með ágætum. Þegar heim var snúið voru í farteskinu nærbuxur litlu færri en heildarfjöldi fólks í sveitarfélaginu. Meira en ár er síðan félagskonur ákváðu að bregða undir sig betri fætinum og skreppa til Glasgow í nokkra daga þannig að undirbúningstíminn var vel rúmur. Átján fullgildar félagskonur fóru í þessa ferð auk þriggja utanfélagskvenna.
Lagt var upp frá Keflavík árla á fimmtudagsmorgni og lent í Glasgow um hádegi. Eftir að tékkað hafði verið inn á hótelið var farið að skoða helstu verslunargötuna til að skanna svæðið enda eitt af markmiðum ferðarinnar að fylla tómar ferðatöskur.
Konurnar borðuðu saman öll þrjú kvöldin í Glasgow og var þá margt skemmtilegt rætt og mörg atriði samin fyrir komandi þorrablót. Í lokahófinu var kannað hversu mikið hefði verið verslað. Meðal helstu niðurstaðna má nefna, að keyptar voru 257 nærbuxur á stóra sem smáa og 62 pör af skóm.
Meðan dvalist var í borginni við Clyde-ána í Láglöndum Skotlands biðu konurnar spenntar eftir því að félagi þeirra Kolfinna Ýr Ingólfsdóttir eignaðist sitt fjórða barn heima á Fróni. Snáðinn sá ákvað hins vegar að bíða aðeins og leit ekki dagsins ljós fyrr en eftir að hópurinn var kominn heim.
Í Skotlandi gengu tvær konur í Kvenfélagið Kötlu, að vísu ekki skoskar heldur rammíslenskar. Þannig eru nú 45 konur í félaginu og verður það að teljast mjög hátt hlutfall í sveitarfélagi með um 280 íbúa eða rétt um 16% af íbúafjöldanum.
„Ferðin var hin besta skemmtun. Við erum strax farnar að skipuleggja næstu ferð!“ segir formaður Kvenfélagsins Kötlu, Ásta Sjöfn Kristjánsdóttir á Litlu-Grund.
Meðfylgjandi myndir tók Indiana Ólafsdóttir á Reykhólum. Fleiri myndir sem hún tók í ferðinni er að finna undir Ljósmyndir > Myndasyrpur í valmyndinni vinstra megin.
01.11.2011 Kvenmannslaus í kulda og trekki kúri ég volandi