Góð veðurspá fyrir Grettislaug
Ekki síst í ljósi einstaklega góðrar veðurspár næstu daga skal minnt á, að Grettislaug á Reykhólum var opnuð á nýjan leik um mánaðamótin eftir hefðbundið tveggja vikna viðhald og vorstandsetningu. Laugin er opin kl. 13-20 alla daga vikunnar í sumar og fram undir ágústlok, þegar tíminn styttist að venju undir haustið.
Grettislaug er sérlega góð 25 metra sundlaug í eigu Reykhólahrepps. Við hana eru heitir pottar og margvíslegt í boði til leikja fyrir börn á öllum aldri. Kappkostað er að halda öllu vel við og iðka snyrtimennsku í hvívetna, enda hefur laugin fengið hina bestu dóma. Við laugina er svæði fyrir tjöld, húsbíla og slíkt.
Myndina tók flugmaðurinn Guðni Þorbjörnsson snemma í vor áður en jörð tók að grænka og ferðafólk að koma. Grettislaug er í suðurjaðri þorpsins á Reykhólum.