Frá fornleifagrefti á Hofstöðum við Þorskafjörð sumarið 2006.

Adolf Friðriksson fornleifafræðingur segir frá rannsóknum á kumlum (legstöðum úr heiðnum sið) í Barðastrandarsýslu og Dalasýslu á aðalfundi Fornleifafélags Barðstrendinga og Dalamanna sem haldinn verður í Búðardal annað kvöld, þriðjudagskvöld. Ekki er ólíklegt að meðal annars komi kumlateigurinn í Berufirði þar við sögu. Hann er einn stærsti grafreiturinn úr heiðnum sið sem fundist hefur hérlendis og mun Snæbjörn í Hergilsey hafa rannsakað hann fyrstur manna.

Fundurinn er öllum opinn. Hann verður í Stjórnsýsluhúsinu í Búðardal og hefst kl. 20.30. Auk venjulegra aðalfundarstarfa verður á dagskrá, auk erindis Adolfs, kynning á tillögum að verkefnum fyrir komandi starfsár.

Formaður Fornleifafélags Barðstrendinga og Dalamanna er Björn Samúelsson á Reykhólum.