Ferðafólk í útilegu tilkynnti lögreglu um örn í vanda í Nátthaga við Berserkjahraun á Snæfellsnesi á föstudagskvöldið. Starfsmaður Náttúrustofu Vesturlands fór á staðinn og handsamaði örninn, sem reyndist vera grútarblautur. Grúturinn eyðileggur einangrunargildi fiðursins og gerir fuglinum jafnframt erfitt um flug.

 

Fuglinn bar merki og hafði verið merktur á síðasta ári sem ungi á eyju í Hvammsfirði.

 

Hann var fluttur í Borgarnes þar sem Kristinn Haukur Skarphéðinsson, starfsmaður Náttúrufræðistofnunar, tók við honum og flutti áfram í Húsdýragarðinn í Reykjavík til aðhlynningar og fiðurþvottar. Vonast er til þess að fuglinn komist aftur til síns heima innan skamms.

 

Þetta kemur fram á vef Náttúrustofu Vesturlands. Þar eru jafnframt fleiri myndir.