Bíll með ferskan lax til útflutnings fastur í drullu á þjóðveginum í Gufudalssveit.

« 1 af 2 »

Tillaga að samgönguáætlun til tíu ára var lögð fram á Alþingi í gær. Henni er skipt í þrjú tímabil og tiltekið hvaða framkvæmdir eru áformaðar og á hvaða tímabili. Áætlað er að verja alls sjö milljörðum króna til nýs vegar um Gufudalssveit, þar af 2.750 milljónum á tímabilinu 2015-2018, 3.250 milljónum á tímabilinu 2019-2022 og 1.000 milljónum á tímabilinu 2023-2026. Lengd hins nýja vegar er sögð óviss. Ekki hefur verið ákveðið hvaða leið skuli valin enda hefur ekki verið unnið í því máli nema mestan hluta þess tíma sem liðinn er af þessari öld.

Á tímabilinu 2019-2022 er gert ráð fyrir 250 milljónum króna til nýs þriggja kílómetra vegarkafla framhjá Skriðulandi í Saurbæ rétt sunnan Gilsfjarðar.

Rétt er að taka fram, að samgönguáætlunin kann að taka breytingum í meðförum þingsins.

Á mynd nr. 2 má sjá áætlunina um vegaframkvæmdir á Vestursvæði, þ.e. á Vesturlandi og Vestfjörðum.

Á fremri myndinni er flutningabíll sem sat fastur í drullu hátt í sólarhring á leiðinni yfir Hjallaháls um miðjan mars á liðnu vori. Hann var á leið upp á hálsinn Djúpafjarðarmegin með tengivagn fullan af laxi frá eldisstöðvum á sunnanverðum Vestfjörðum. Auk annarrar umferðar er ekið með skólabörn í Reykhólaskóla þessa leið fram og til baka sérhvern skóladag allt skólaárið.

Tillaga til þingsályktunar um samgönguáætlun fyrir árin 2015-2026 (pdf).

Undirbúningsframkvæmdir í Djúpafirði á næsta ári (frétt 15. september 2016).