Núna eru Reykhólamenn í fyrsta sinn meðal liðsmanna í bridgesveit Vestfirðinga á kjördæmamóti Bridgesambands Íslands, sem fram fer á Siglufirði um helgina. Það eru þeir Eyvindur Magnússon og Jökull Kristjánsson, sem fengu gullverðlaunin á opnu bridgemóti á Jörfagleði Dalamanna um páskana. Kjördæmamótið hefur verið haldið ár hvert í meira en tvo áratugi. Eins og áður er miðað við gömlu kjördæmin átta en ekki núverandi kjördæmaskipan.

 

Óskar Elíasson í Súðavík er í sveit Vestfirðinga og hefur aldrei frá upphafi misst úr mót. Þegar tíðindamaður Reykhólavefjarins / bb.is heyrði í honum síðdegis var hann í kaffi í Brú í Hrútafirði á leiðinni norður. Hann sagði að mótið legðist bara vel í mannskapinn en sem gamalreyndur maður vildi hann engu spá um úrslitin.

 

bb.is  Hefur aldrei misst úr kjördæmamót í bridge

30.04.2011  Bridge: Reykhólamenn fengu gull og bikara