Hæstiréttur felldi í gær úr gildi úrskurð Jónínu Bjartmarz, fyrrverandi umhverfisráðherra, um að leyfa vegagerð í Teigsskógi í Reykhólahreppi. Var dómurinn staðfesting á dómi Héraðsdóms Reykjavíkur fyrir ári. Forsenda dómsins var að umhverfisráðherra hefði ekki verið heimilt að byggja úrskurð sinn um mat á umhverfisáhrifum á því hvaða áhrif lagning vegarins hefði á umferðaröryggi. Þar væri um að ræða ávinning af framkvæmdinni sjálfri, en ekki hluta af umhverfisáhrifum hennar.

 

Málið á sér langa forsögu. Fylgjendur þess að önnur leið yrði valin en í gegnum skóginn bentu á að hann nyti sérstöðu á Vestfjörðum og landinu í heild en andstæðingar þess létu hafa eftir sér að „birkihríslur" væru „meira metnar en mannslíf".

 

Eftir töluverðar deilur samþykkti þáverandi umhverfisráðherra að leið B í 2. áfanga yrði farin, þar sem vegastæðið liggur um Teigsskóg í Þorskafirði, enda væri það óumdeilt að leið um Teigsskóg væri betri kostur en aðrar leiðir á milli Bjarkalundar og Eyrar í Reykhólahreppi. Skipulagsstofnun lagðist árið 2006 gegn því, að Vestfjarðavegur yrði lagður samkvæmt tillögu B á leiðinni frá Bjarkalundi til Eyrar. Nýja veginum er ætlað að bæta samgöngur annars vegar innan Reykhólahrepps og hins vegar frá Hringvegi til og frá Vestur-Barðastrandarsýslu og norðanverðra Vestfjarða.

 

Jónína Bjartmarz, þáverandi umhverfisráðherra, felldi hins vegar úrskurð Skipulagsstofnunar úr gildi og féllst á tillögu Vegagerðarinnar um að fara með veginn um Teigsskóg með tilteknum skilyrðum. Landeigendur og náttúruverndarfélög töldu að slík vegagerð myndi hafa í för með sér gríðarleg óafturkræf umhverfisspjöll í nær ósnortnu umhverfi og höfðuðu því mál til að fá úrskurð ráðherra ógiltan. Vegagerðin skaut málinu til Hæstaréttar í desember síðastliðnum.

 

bb.is

 

Dómur Hæstaréttar