Hópurinn gaf sér góðan tíma í versluninni Hólakaupum á Reykhólum.

Tuttugu manna hópur karla og kvenna á hinum frægu Harley-Davidson mótorhjólum kom í heimsókn í Reykhólasveitina í morgun. Þau eru í eigendafélagi Harley-Davidson á Íslandi eða H.O.G. (Harley Owners Group), en alls eru 95 manns í klúbbnum. Formaður hans er Kristján Finnsson frá Skerðingsstöðum í Reykhólasveit og að sjálfsögðu er hann í þessari sumarferð.

Í gær var farinn hringurinn kringum Snæfellsnes og síðar í dag liggur leiðin norður á Drangsnes við Steingrímsfjörð áður en haldið verður aftur suður á höfuðborgarsvæðið. Veðrið lék sannarlega við hópinn í skoðunarferðinni um Reykhólahrepp og sólin skein með glaðasta móti.