Harpa Eiríksdóttir ferðamálafræðingur. Nánar í meginmáli. Ljósm. hþm.

Skipað hefur verið í nýtt ráðgjafaráð Markaðsstofu Vestfjarða. Í því eiga sæti þrír fulltrúar úr stjórn Ferðamálasamtaka Vestfjarða, þau Harpa Eiríksdóttir á Reykhólum, Einar Kristinn Jónsson á Patreksfirði og Þorsteinn Másson í Bolungarvík, og tveir fulltrúar skipaðir af Fjórðungssambandi Vestfirðinga, þau Sigríður Ólöf Kristjánsdóttir í Hnífsdal og Jón Páll Hreinsson á Ísafirði. Þær Harpa og Sigríður Ólöf áttu sæti í ráðinu fyrir en karlarnir eru þar allir nýir.

Á myndinni er áðurnefnd Harpa Eiríksdóttir ferðamálafræðingur á Reykhólum hjá einu af æðarhreiðrunum sem jafnan eru við Staðarhöfn á Reykjanesi, liðlega tíu kílómetra fyrir utan Reykhóla. Æðarkollan var „ekki heima“ rétt þegar myndin var tekin, en kollurnar láta sér návist og umsvif mannfólks þarna við höfnina vel líka. Efst til vinstri eru grannbæirnir Árbær og Staður, þar sem Harpa er upprunnin. Myndin var tekin á liðnu vori.