Dr. Peter Weiss, forstöðumaður Háskólaseturs Vestfjarða, verður til viðtals í Stjórnsýsluhúsinu á Reykhólum (skrifstofum hreppsins) milli kl. 13.30 og 14.30 á morgun, miðvikudag, og kynnir nýja námsleið. Þar er um að ræða Sjávartengda nýsköpun sem fer af stað núna í haust, en snemmsumars á næsta ári er fyrirhugað að halda á Reykhólum svokallað lotunámskeið sem ber vinnuheitið Nýsköpun í þörunganotkun.

Peter segir að þessi nýja námsleið sé einstaklingsmiðuð og gæti hentað vel fólki í dreifbýli.

Áhugasamt fólk er eindregið hvatt til að hitta Peter á Reykhólum á morgun og kynna sér það sem í boði er. Tekið skal fram, að hann er afskaplega góður íslenskumaður þrátt fyrir þýskan uppruna sinn - eða kannski vegna hans. Peter hefur veitt Háskólasetri Vestfjarða forstöðu frá upphafi fyrir rúmum sjö árum.

Fyrir liðlega fjórum árum birtist í vikublaðinu Bæjarins besta á Ísafirði ítarlegt opnuviðtal („mannlífsviðtal“) við hinn bæverska Peter Weiss og má lesa það hér.

► Háskólasetur Vestfjarða