Frá Flókalundi í Bjarkalund ...

Um komandi helgi verður blásið til „haustlitahlaups" úr Flókalundi við Vatnsfjörð syðri í Bjarkalund milli Þorskafjarðar og Berufjarðar eða um meginhluta Reykhólahrepps. Þátttakendur geta hlaupið alla leiðina eða hluta hennar eftir því sem hentar. Ítarlega er greint frá hlaupinu, tildrögum þess og tilhögun á vefnum laugaskokk.is og segir þar meðal annars:

Komið hefur upp sú hugmynd að fara í förin hans Gunnlaugs Júlíussonar langvegalengdahlaupara sem þjálfar fyrir hlaupið mikla í septemberlok í Grikklandi, 240 km milli Aþenu og Spörtu og kallast Spartathlon. Landslag í þessum hluta Barðastrandarsýslna er afar fjölbreytt: Firðir, fjörur, eyjar úti fyrir, dalir inn af. Hálsar milli fjarða, kjarr í hlíðum með stökum reynitrjám. Landinu svipar hvað hæðir varðar til Grikklands.

Lagt verður af stað frá Flókalundi kl. 9 á laugardagsmorgni. Dagleiðin verður líklega að Kletti austan við Klettsháls því þar er leiðin u.þ.b. hálfnuð. Þaðan er hægt að aka austur í Djúpadal þar sem er heit sundlaug. Gistingar yrðu á sveitabæjum, í tjöldum, bílum eða hótelum sem fólk finnur sér. Farið af stað á sunnudagsmorgni frá Kletti austur til Bjarkalundar. Tímasetning hlaupaloka verður síðla sunnudags.

Um 40% af leiðinni eru malbikuð, hitt er vestfirskur malarvegur. Hlaupið mætti heita Gunnlaugshlaup og vera nýtt fjallahlaup í skaplegri fjarlægð frá Reykjavík. Það rúmast ekki allir á Laugaveginum hvort eð er.

Á vefnum laugaskokk.is segir að vegalengdin Flókalundur-Bjarkalundur sé um 140 km og kemur þar einnig fram, að hlaupið verði eftir veginum. Á vegalengdaskrá Vegagerðarinnar er sú leið hins vegar sögð vera 124 km. Á misræmi þessu kunna að vera eðlilegar skýringar.

Sá ágalli er á því sem fram kemur á Laugaskokksvefnum, að yfirskriftin er Haustlitahlaup á Barðaströnd. Leiðin liggur hins vegar ekki að neinu leyti um Barðaströnd, sem er vestur af Flókalundi.

Því má bæta við, að hugmyndir eru uppi um að gera þetta hlaup að alþjóðlegu hlaupi í framtíðinni.

Nánar á vefnum laugaskokk.is.

Grunnur kortsins á myndinni er tekinn af vef Landmælinga Íslands (lmi.is).