Ágúst Atlason áhugaljósmyndari frá Ísafirði. Ljósmynd: Magnús Andersen.

Heimildaverkefnið „Vestfirskir listamenn & lífskúnstnerar“ verður unnið á fyrstu mánuðum komandi árs með stuðningi Menningarráðs Vestfjarða. Tilgangur þess er að halda utan um brot úr vestfirskri menningu eins og hún er 2011-12. Það verður byggt upp á ljósmyndum og mjög stuttum textum um listamenn og „lífskúnstnera“. Ljósmynd af viðkomandi verður tekin í vinnustofu eða umhverfi vinnunnar, svokallað umhverfisportrett.

„Það sem viðkomandi þarf að hafa gert til að falla undir titil þessa verkefnis er að hafa gert list eða menningarverkefnum skil og vera sýnilegur á einhvern hátt, eins og t.d. með sýningum á verkum sínum eða sýnilegri aðkomu að góðum verkefnum. Eiginlega fellur öll menningartengd ferðaþjónusta undir þessa skilgreiningu“, segir Ágúst Atlason frá Ísafirði, sem kunnur er af ljósmyndum sínum. Meðal annars hefur hann ferðast um allan Vestfjarðakjálkann og tekið myndir af náttúru og fólki, þar á meðal í Reykhólahreppi.

Meðal þeirra sem þegar hafa samþykkt að taka þátt í verkefninu eru Spessi ljósmyndari (Sigurþór Hallbjörnsson), Elfar Logi Hannesson leikari, Marsibil Kristjánsdóttir og Matthildur Jónu- og Helgadóttir listakonur og Sigurður Atlason lífskúnstner á Ströndum.

Áætlað er að 30 viðfangsefni verði í verkinu. Listamönnum & lífskúnstnerum verður bæði boðin þátttaka og einnig er hægt að benda á sjálfan sig ef viðkomandi finnst hann hafa það til brunns að bera sem þarf til að vera með í verkefni sem slíku. Tilnefningar frá öðrum eru líka mjög vel þegnar. Verkefnið mun fá eigin vefsíðu og ljósmyndasýningu sem verður hengd upp í helstu bæjarkjörnum Vestfjarða, svokölluð farandsýning. Ef vel tekst til og allt gengur upp verður verkefnið sett í bók.

„Að mínu áliti mun svona verk skila til samfélagsins nauðsynlegum heimildum um listamenn & lífskúnstnera þessarar kynslóðar. Einnig mun það varpa ljósi á marga listamenn sem fáir vita af en gætu haft umtalsverða hæfileika sem gætu verið fyrir fleiri að njóta. Vestfirðir hafa alltaf einkennst af menningu og frumkvöðlastarfi. Ætlun mín að gera því aðeins hærra undir höfði. Áætlað er að vinna verkið í janúar, febrúar og mars 2011“, segir Ágúst. „Öll list er meðtekin inn í verkefnið, hvort sem það er t.d grafitti, tónlist, myndlist, ljósmyndun, handverk, vídeó, skúlptúr, gjörningar, leiklist eða hvað sem er - ef það er list, láttu í þér heyra!“

Tilnefningar eða óskir um þátttöku berist á netfangið agustatla@gmail.com og þar fást einnig nánari upplýsingar.

Vefpósturinn þarf að innihalda:

• Nafn
• Heimilisfang
• Símanúmer
• Netfang
• Veffang ef við á
• Stutta lýsingu á verkum viðkomandi

Um Ágúst Atlason:

Ágúst Atlason áhugaljósmyndari hefur lagt stund á ljósmyndun í fimmtán ár og haldið fjölda ljósmyndasýninga um alla Vestfirði. Aðallega hefur hann beint linsu sinni að Vestfjörðum og má þar nefna verkefnið Focus Westfjords og dagatal Þjóðbúningafélags Vestfjarða sem dæmi. Ágúst stundar nú nám í ljósmyndun í Medieskolerne i Viborg í Danmörku. Ljósmyndasíðu Ágústs Atlasonar er að finna undir Ljósmyndir > Ýmis myndasöfn í valmyndinni hér vinstra megin.