Segja má að nánast hálf dagskráin á Barmahlíðardeginum þetta árið á sumardaginn fyrsta hafi farið fram á Dvalarheimilinu Barmahlíð á Reykhólum að viðstöddum allmörgum gestum. Nokkuð var tekið þar af myndum og fylgja hér fáeinar. Í byrjun var hlýleg helgistund sem sr. Elína Hrund Kristjánsdóttir annaðist en kirkjukórinn söng og Sóley Vilhjálmsdóttir í Nesi lék undir á gítar. Þá var bingó „eldri borgara“ sem Guðrún Guðmundsdóttir stjórnaði og loks lék kvartett nokkur létt lög fyrir mannskapinn. Kvartettinn skipuðu Hafliði Ólafsson í Garpsdal, Ásdís Jónsdóttir á Hólmavík og feðginin Jóhann Elísson og Hanna Valdís Jóhannsdóttir á Skerðingsstöðum í Dalabyggð. Ekki var dansað við þetta tækifæri nema hvað þær Lóa á Miðjanesi og Ása í Árbæ stóðust ekki fótafiðring eins og sjá má á einni myndanna.

 

Meðal þeirra gesta sem glöddu heimilisfólk með nærveru sinni má nefna bæði sveitarstjóra og skrifstofustjóra Reykhólahrepps auk þess sem oddvitinn söng í kirkjukórnum.

 

Smellið á myndirnar til að stækka þær. Jafnframt hafa þær verið settar inn í Ljósmyndir > Myndasyrpur > Barmahlíðardagurinn 2011 í valmyndinni hér vinstra megin. Myndirnar eru í sömu röð og þær voru teknar.

 

Þennan dag var jafnframt handavinnusýning heimilisfólks í Barmahlíð á efri hæðinni og má e.t.v. vænta hér ljósmynda þaðan áður en langt um líður.