Heyskapur með allra fyrsta móti og spretta geysimikil
Sláttur hófst á Seljanesi í Reykhólasveit á þriðjudag, 10. júní, og hirðingu lýkur í dag. Bændurnir á Stað eru nú með túnin á Seljanesi annað árið í röð og var Eiríkur Snæbjörnsson að tína saman síðustu rúllurnar núna eftir hádegið. Hvorki hann né Dagný Stefánsdóttir á Seljanesi vissu til þess að sláttur væri byrjaður víðar í héraðinu enda er þetta með allra fyrsta móti. Þrátt fyrir það er heyfengurinn af túnunum á Seljanesi ámóta mikill eða meiri en venjulega þegar mun seinna hefur verið slegið enda hefur sprettan verið geysimikil.
Gangurinn í heyskapnum á þessa daga hefur verið mjög góður. Heyið var orðið vel þurrt þegar því var rúllað í gær og kvaðst Eiríkur strax ætla að bera á túnaslétturnar á Seljanesi á ný. Búendur á Stað eru annars vegar Sigfríður Magnúsdóttir og Eiríkur Snæbjörnsson og hins vegar dóttir þeirra og tengdasonur, Rebekka Eiríksdóttir og Kristján Þór Ebenesersson.