1. janúar 2013 |
Hlaðan sundraðist í veðurofsanum
Gömul hlaða á Skerðingsstöðum í Reykhólasveit sundraðist í ofsanum á laugardag. „Þetta er í sjálfu sér ekkert tjón, þetta var gamalt og lélegt hús sem átti að rífa, var bara ekki búið að koma því í verk“, segir Jón Árni Sigurðsson frá Skerðingsstöðum, sem búsettur er á Reykhólum. Hlaðan var úr timbri en á steyptum grunni, „og hann er brotinn eftir lætin þannig að eitthvað hefur nú gengið á“, segir Jón Árni.
Það eina sem hægt væri að kalla tjón á Skerðingsstöðum í óveðrinu var að nokkrir staurar í nýrri girðingu meðfram þjóðveginum gáfu sig.
Skerðingsstaðir eru fáeina kílómetra utan við Reykhóla. Þar er ekki lengur búskapur.
Myndirnar af verksummerkjum veðursins á Skerðingsstöðum sem hér fylgja tók Hrefna Jónsdóttir.