Erindi Vilborgar Ásu Fossdal og Reynis Þórs Róbertssonar, sem reka Hólabúð á Reykhólum, varðandi samstarf um vörukaup fyrir mötuneyti Reykhólaskóla og Barmahlíðar, var tekið fyrir á fundi sveitarstjórnar Reykhólahrepps í gær. „Hólabúð er hér með tilbúin að veita Reykhólahreppi 15% afslátt af öllum vörukaupum, ef samningur næst,“ segir í bréfinu.

„Beiðnin er gerð í von um að báðir aðilar muni njóta góðs af, jafnt sem íbúar hreppsins, þar sem vörubirgjar væru frekar í stakk búnir að veita hærri afslátt til Hólabúðar, og mun sá afsláttur skila sér í lægra vöruverði til Reykhólahrepps jafnt sem viðskiptavina búðarinnar,“ segir þar einnig.

„Það er einlægur vilji okkar að halda áfram að reka Hólabúð og búa hér á staðnum, þar sem okkur hjónum og börnum líður afar vel hérna. Samningur þessi myndi styrkja rekstur Hólabúðar.“

Sveitarstjórn bókaði, að sveitarstjóra og forstöðumanni mötuneytis væri falið að funda með aðilum og ræða erindið.