Eyvindur S. Magnússon.

Eyvindur Magnússon kaupmaður í Hólakaupum á Reykhólum er ósáttur við framkvæmd verðkönnunar í verslunum á Vestfjörðum. Könnun þessi var gerð fyrir Verkalýðsfélag Vestfirðinga og niðurstöður hennar birtar á vef félagsins í gær. Í framhaldi af því var í gær greint frá könnuninni á fréttavefnum bb.is á Ísafirði. Athugasemdir Eyvindar hafa nú birst í annarri frétt á bb.is. Þar segir m.a.:

Tveir kaupmenn á Vestfjörðum hafa gert athugasemdir við framkvæmd verðkönnunar Verkalýðsfélags Vestfirðinga sem framkvæmd var á dögunum. Annar þeirra er Eyvindur Magnússon kaupmaður í Hólakaupum á Reykhólum. Hann segist vera hlynntur verðkönnunum en rétt skuli vera rétt. Hann segir sjö atriði vera röng varðandi verðkönnun hjá hans verslun og það geti ekki verið klaufamistök.

„Ég ætla að taka það fram strax að ég er mjög hlynntur verðkönnunum. En að því sögðu er það mín krafa að vandað sé til verka svo að upplýsingar komist réttar til neytenda. Að slá fram niðurstöðum eins og er gert þarna er engum til gagns og líka eru greinileg merki um óvandvirkni í öðrum verslunum, Bónus er til dæmis með langtum hærra verð á súrmjólk en aðrir, sem ég efast um að sé rétt,“ segir Eyvindur, en hann hefur sent formlega athugasemd til félagsins.

Einnig segir Eyvindur í fréttinni á bb.is:

„Eftirtalin atriði voru til í versluninni en eru skráð með e sem þýðir væntanlega ekki til: KEA skyrdrykkur með jarðarberjabragði, Frón Pólo kex, Homeblest kex, þurrkaðar sveskjur, túrtappar OB en þau voru til. Síðan er ég skráður með ódýrasta kílóverð Kelloggs kornflex sem væri gaman en ég hef ekki haft Kelloggs í rúmt ár, bara Coop. Síðan er ég skráður með langhæsta verð á strásykri en þetta er verðið á 2 kg pk DDS sykri hér í búðinni í stað kílóverðs annars staðar.“

Jafnframt segir Eyvindur að ekkert hafi verið minnst á 100% verðmerkingar í búðinni.

Nokkra athygli kann að vekja, að vörutegundir með tilgreindu verði hjá einstökum verslunum (og þar með teknar með í verðsamanburðinum) eru allt niður í tvær talsins.

► Frétt bb.is í dag í heild - þar er m.a. einnig rætt við formann Verkalýðsfélags Vestfirðinga

► Frétt bb.is í gær

► Fréttin á vef Verkalýðsfélags Vestfirðinga - eitthvað breytt frá því sem var í upphafi

► Verðkönnunin - pdf-skjal