Fyrr á þessu ári sendi Reykhólahreppur beiðni til Landsbankans um hraðbanka á Reykhólum. „Það er ósk okkar að Landsbankinn skoði möguleikann á því að setja upp hraðbanka í safnahúsinu / upplýsingamiðstöðinni með þjónustu frá útibúinu í Króksfjarðarnesi. Það er enginn hraðbanki í þjóðbraut frá Akranesi til Patreksfjarðar og gæti hraðbanki á Reykhólum verið Landsbankanum til heilla og dregið til sín hluta þeirra fjölmörgu ferðamanna sem leið eiga um Reykhóla á ferð sinni um Vestfirði“, segir í erindi sveitarstjóra til bankans.

„Reykhólahreppur státar af útibúi frá Landsbankanum í Króksfjarðarnesi sem þjónar íbúum hreppsins af mikilli alúð. Við þökkum fyrir að staðinn hefur verið vörður um útibúið enda þjónar það stóru hlutverki í daglegu lífi íbúa og fyrirtækja í hreppnum.

Hingað til hefur ekki verið talinn grundvöllur fyrir uppsetningu hraðbanka á Reykhólum enda íbúar fáir og þjónusta við bankann dýr. Nú hafa orðið á breytingar sem felast í auknum straumi ferðamanna til hreppsins. Gistinóttum ferðamanna hefur fjölgað úr tæplega 70.000 í 112.000 á Vestfjörðum á síðustu þremur árum, þar af úr um 3.000 í rúmlega 5.000 í Reykhólahreppi einum“, segir m.a. í erindi sveitarstjóra til Landsbankans.

Jafnvel er búist við niðurstöðu í málinu þessa dagana.