Byggðarendi (húsið byggt 1950).

Það er alveg með einsdæmum hve Flateyingar eru duglegir að dytta að húsum sínum og gera vel við eignir sínar í Flatey. Tekið er eftir og umtalað hve húsin í Flatey eru velviðhaldin, fallega uppgerð og bera fagurt vitni um heilstæða fallega húsamynd fyrri tíðar.

Þannig hefst pistilkorn sem Gunnar Sveinsson í Læknishúsi skrifaði á vef Framfarafélags Flateyjar (FFF) snemma á liðnu sumri undir yfirskriftinni Mikil framkvæmdagleði í Flatey. Þar nefnir Gunnar nokkur dæmi og fylgja myndir því til stuðnings. Lokaorðin eru þessi:

Framkvæmdagleði Flateyinga er talandi dæmi um umhyggju þeirra og þann hug sem húseigendur bera til Flateyjar.

Mörg er matarholan á hinni glæsilegu heimasíðu Framfarafélagsins, sem tekin var í notkun í fyrravor, eins og hér var á sínum tíma greint frá. Njótið!

Á myndinni sem hér fylgir og fengin er af síðunni getur að líta Byggðarenda, sem hlaut Umhverfisverðlaun FFF árið 2010.