Harpa Eiríksdóttir, nýráðinn ferðamálafulltrúi Reykhólahrepps, þarf núna fyrir vikulokin að negla niður dagsetningu Reykhóladaganna í sumar. Hún óskar eindregið eftir skoðunum og tillögum í því efni. Ástæða þess hversu snarlega þarf að ákveða þetta núna er að tímasetningunni þarf að koma í viðburðadagskrána í Símaskránni.

 

Byggðarhátíðin Reykhóladagurinn hefur verið haldin hátíðleg í lok ágúst í nokkur ár. Á síðasta ári breyttist nafngiftin og talað var um Reykhóladaga, vegna þess að þá spönnuðu viðburðirnir allt frá föstudegi til sunnudags. Væntanlega verður svo einnig í ár, og jafnvel allt frá fimmtudegi.

 

Spurningunni um tímasetningu Reykhóladaganna var velt upp hér á vefnum í lok síðasta mánaðar. Þá komu fram þær skoðanir, að þeim skyldi flýtt til fyrstu helgarinnar í ágúst. Meðal annars væri heppilegt að tengja þá með einhverjum hætti við Ólafsdalshátíðina, sem er haldin um þá helgi.

 

Jafnframt má spyrja álits á því, hvort vilji sé fyrir því að tala um Reykhólahátíð fremur en Reykhóladaga.

 

Endilega látið í ljós álit á þessu, annað hvort hér í athugasemdadálkinum eða í tölvupósti til Hörpu Eiríksdóttur - nema hvort tveggja sé!

 

Sjá einnig:

30.01.2011  Er rétt að færa Reykhóladaginn framar?

31.08.2010  Um 400 manns sóttu viðburði laugardagsins

25.08.2010  Mjög fjölbreytt dagskrá á Reykhóladögum 2010

20.08.2008  Reykhólahreppur meðal stofnenda Ólafsdalsfélagsins