Hver er forgangsröðunin? Hver er sparnaðurinn?
Það er ótrúleg upplifun að enn skuli vera höggvið í sama knérunn og þrengt að þjónustu við veika aldraða. Þessi gjörningur mun skapa óöryggi og mikið rask meðal þessara sjúklinga og aðstandenda þeirra. Það er líka undarlegt, að á sama tíma og rannsóknir sýna að það vantar hjúkrunarrými í landinu, þá skuli eiga að leggja það niður sem fyrir er. Hver er eiginlega forgangsröðunin í opinberum fjármálum? Hver er sparnaðurinn? Þarf ekki áfram að hjúkra þessu fólki og er ekki betra að það fái að vera þar sem það hefur verið og það starfsfólk sinni umönnun þess sem hefur sérhæft sig til þess á undanförnum árum?
Þannig spyr Jóna Valgerður Kristjánsdóttir í Mýrartungu í Reykhólasveit, formaður Landssambands eldri borgara, í grein hér á vefnum (Sjónarmið / Aðsent efni í valmyndinni vinstra megin) undir fyrirsögninni Mótmæli vegna lokunar öldrunar- og endurhæfingardeildar á sjúkrahúsinu á Akranesi.