Um þessar mundir er unnið af kappi að undirbúningi Reykhóladagsins sem að þessu sinni verður laugardaginn 29. ágúst. Forsmekkurinn að honum verður spurningakeppni dagana á undan eins og hér hefur verið greint frá. Óskað er eftir skemmtilegum atriðum til þess að sýna í hléum í keppninni. Kolfinna Ýr í síma 861 3761 tekur á móti þeim sem hafa áhuga og eiga sér draum um að koma fram.

 

Jafnframt skal minnt á sveitamarkaðinn sem áður hefur verið getið hér á vefnum. Á Reykhóladaginn er ætlunin að vera með markað þar sem hægt verður að smakka og kaupa heimaframleiðslu fólks í héraðinu. Spurt er hvort eitthvað leynist í eldhúsinu sem fólk vill deila með öðrum. Í því efni er það einnig Kolfinna Ýr í ofangreindum síma sem veitir nánari upplýsingar og tekur við skráningum.