Friðrik, Sturla og Einar Sveinn taka höndum saman.

Stykkishólmsbær, Matís og írska fyrirtækið Marigot, sem á Íslenska kalkþörungafélagið á Bíldudal, hafa undirritað samkomulag um samstarf í tengslum við nýtt verkefni, sem lýtur að frekari nýtingu stórþörunga í Breiðafirði í nýju iðnfyrirtæki, Deltagen Iceland. Áformað er að reisa verksmiðju í Stykkishólmi þar sem unnir verði hágæða þörungakjarnar til útflutnings. Gangi áætlanir eftir má gera ráð fyrir að starfsemi Deltagen Iceland með 15 nýjum heilsársstörfum hefjist á síðari hluta næsta árs.

Þetta kemur fram í fréttatilkynningu. Þar segir einnig m.a.:

„Sjálfbær nýting þangs og stórþörunga við Breiðafjörð er grundvöllur samstarfsins. Rannsóknir benda til að sjálfbær ávöxtun auðlindarinnar sé talsvert meiri en sem nemur núverandi nýtingu. Í samkomulaginu er tekið fram að ávallt verði gætt að varúðarsjónarmiðum við sérhverja framkvæmd sem fyrirhuguð starfsemi mun krefjast, enda eru þau grundvöllur sjálfbærrar þróunar á nýtingu lífrænna auðlinda. Megináhersla verður lögð á vísindalega nálgun við nýtingu auðlindarinnar með það að markmiði að fullnýta hráefnið með sem minnstum áhrifum á umhverfið samhliða sem mestum svæðisbundnum efnahagslegum ávinningi.“

Á myndinni eru Friðrik Friðriksson, stjórnarformaður Matís, Sturla Böðvarsson bæjarstjóri Stykkishólmsbæjar, og Einar Sveinn Ólafsson, framkvæmdastjóri Íslenska kalkþörungafélagsins, við undirritun samkomulagsins.