Í minningu Barðstrendings
Minningarathöfn var í Hólavallakirkjugarði við Suðurgötu í Reykjavík í gær, en þá voru nákvæmlega níutíu ár síðan Arnfinnur Jónsson, 19 ára sjómaður frá Eyri í Gufudalssveit í Austur-Barðastrandarsýslu, var jarðsettur í garðinum. Arnfinnur drukknaði í Reykjavíkurhöfn 10. júlí 1918. Lengi vel var ekki vitað hvar Arnfinnur hvíldi en gröf hans fannst nýlega, að mestu fyrir tilviljun. Frændi og nafni sjómannsins unga, Arnfinnur Sævar Jónsson, kaupmaður í Leonard og fyrrverandi knattspyrnumaður, lét gera legstein sem fenginn var í landi Hafrafells við Berufjörð, en sjómaðurinn var ömmubróðir kaupmannsins.
Nánustu ættingjar Arnfinns heitins Jónssonar voru við athöfnina í Hólavallakirkjugarði í gærmorgun. Þar fór Hjálmar Jónsson dómkirkjuprestur með bænarorð og blómsveigur var lagður á leiðið.
Arnfinnur Jónsson var fæddur á Hamri í Brjánslækjarprestakalli 18. apríl 1899, sonur hjónanna Jóns Finns Arnfinnssonar og Elínar Guðmundsdóttur, sem jarðsett eru í Gufudalskirkjugarði. Þegar Arnfinnur var á fyrsta ári flutti hann með foreldrum sínum að Bæ á Berjanesi, átta árum síðar að Fjarðarhorni og loks að Eyri í Kollafirði.
Fjögur systkini Arnfinns náðu fullorðinsaldri: 1. Guðný Jónsdóttir, kona Þórarins J. Einarssonar, kennara í Austur-Barðastrandarsýslu og við Austurbæjarskólann í Reykjavík. 2. Anna Jónsdóttir saumakona í Reykjavík, lengi búsett í Kaupmannahöfn. 3. Kristín G. Jónsdóttir, kona Sigurðar Jónssonar bónda á Skálanesi í Gufudalssveit, síðar bifreiðastjóra á Akranesi. 4. Ingibjörg Sæunn Jónsdóttir, kona Bertels Andréssonar skipstjóra.