Jón á Kirkjubóli hlaut fyrstur Landstólpann
Jón Jónsson á Kirkjubóli við Steingrímsfjörð á Ströndum, ferðaþjónn, fræðimaður, menningarfulltrúi, sveitarstjórnarmaður og sitthvað fleira, var í gær sæmdur hinni nýstofnuðu samfélagsviðurkenningu Byggðastofnunar, Landstólpanum, á ársfundi stofnunarinnar á Sauðárkróki. Þetta er í fyrsta sinn sem viðurkenningin er veitt en áformað er að veita hana árlega. Í vor leitaði Byggðastofnun eftir tilnefningum um einstakling, fyrirtæki, stofnun eða sveitarfélag sem til greina þætti koma og síðan fór dómnefnd yfir tilnefningarnar.
Í rökstuðningi með útnefningunni kom fram að um nokkurs konar bjartsýnisverðlaun sé að ræða. Jón hafi með störfum sínum vakið jákvæða athygli á sinni heimabyggð og verið ötull talsmaður ferðaþjónustu og menningar á Vestfjörðum. Þá sé hann virkur í félagsstarfi og menningarlífi sem og frumkvöðull í uppbyggingu ferðaþjónustu, menningarstofnana og fræðastarfs á svæðinu.
Í reglum um Landstólpann kemur fram, að viðurkenningin skuli veitt einhverjum sem hefur vakið jákvæða athygli á landsbyggðinni með verkefni, starfsemi, umfjöllun á opinberum vettvangi eða með öðru móti. Viðkomandi gæti bæði hafa vakið athygli á byggðamálum, landsbyggðinni í heild eða einhverju tilteknu byggðarlagi og þannig aukið veg viðkomandi samfélags.
Jón Jónsson er þjóðfræðingur að mennt. Ásamt fjölskyldu sinni rekur hann ferðaþjónustu á Kirkjubóli við Steingrímsfjörð. Frá því að staða menningarfulltrúa, þ.e. framkvæmdastjóra Menningarráðs Vestfjarða, var sett á laggirnar fyrir fjórum árum hefur Jón gegnt henni. Hann er í sveitarstjórn Strandabyggðar og stjórn Fjórðungssambands Vestfirðinga. Árið 2004 stofnaði hann héraðsvefinn strandir.is og hefur verið ritstjóri hans alla tíð.
Nafngiftin Landstólpi er fengin úr alkunnu erindi í kvæðinu Alþing hið nýja, sem Jónas Hallgrímsson orti árið 1840:
Traustir skulu hornsteinar
hárra sala.
Í kili skal kjörviður.
Bóndi er bústólpi,
bú er landstólpi.
Því skal hann virður vel.