Kennimerki félagsþjónustunnar valið
Nýlega var haldin samkeppni um kennimerki (lógó) Félagsþjónustu Stranda og Reykhólahrepps og voru allmargar tillögur sendar inn. Valið var erfitt þar sem allar tillögurnar voru vandaðar, hugmyndaríkar og skemmtilegar, segir í tilkynningu. Hins vegar þarf alltaf að velja eina og bar Friðlaugur Jónsson sigur úr býtum. Tillaga hans var með skírskotun í galdratákn og byggðasögu svæðisins með nútímalegri nálgun.
Upphafsstafir Félagsþjónustu Stranda og Reykhólahrepps (FSR) eru í kennimerkinu auk þess sem 4 hlutar tákna þau fjögur sveitarfélög sem mynda félagsþjónustuna en það eru Árneshreppur, Kaldrananeshreppur, Reykhólahreppur og Strandabyggð. Græni hlutinn táknar notendur félagsþjónustunnar.
Friðlaugur er fæddur og uppalinn á Ísafirði en býr í Reykjavík í dag. Hann útskrifaðist sem grafískur hönnuður frá Myndlistaskólanum á Akureyri árið 2008. Hann hefur unnið á hinum ýmsu auglýsingastofum og grafísku vinnustofum auk þess sem hann sá um umbrot og útgáfu sjónvarpsvísisins Almanaks við annan mann um tveggja ára skeið. Í dag starfar hann hjá tölvuleikjafyrirtækinu Fancy Pants Global í Kópavogi sem sérhæfir sig í leikjum og forritum fyrir snjallsíma og tölvur. Skemmst er frá því að segja að hann vann einnig merkjasamkeppni sem haldin var í vor á vegum Snjóflóðaseturs Veðurstofu Íslands fyrir SNAPS-verkefnið. Heimasíða höfundar er www.frilli7.com.
Auk heiðursins af höfundarrétti kennimerkisins voru 50.000 krónur í verðlaun. Félagsþjónusta Stranda og Reykhólahrepps þakkar öllum þátttökundum fyrir sendar tillögur og óskar Friðlaugi innilega til hamingju með heiðurinn.