Kjósendur geta nú kannað hvar þeir eru á kjörskrá í sveitarstjórnarkosningunum 29. maí á kosningavef dómsmála- og mannréttindaráðuneytisins og á vef Þjóðskrár. Með því að slá inn kennitölu kjósanda kemur upp nafn hans, lögheimili og sveitarfélag. Reykvíkingar og íbúar nokkurra stærstu sveitarfélaganna fá einnig upplýsingar um kjörstaði og kjördeildir. Þjóðskrá sér um gerð kjörskrárstofna samkvæmt lögum um kosningar til sveitarstjórna. Á kjörskrá eiga að vera allir íslenskir ríkisborgarar sem skráðir voru með lögheimili í ákveðnu sveitarfélagi samkvæmt íbúaskrá Þjóðskrár 8. maí 2010 og fæddir eru 29. maí 1992 og fyrr.